Қарағанды облысында полицейлер ірі нарколабораторияны әшкереледі.
Оперативтік жұмыстар мен қылмыстық өндірісті жою барысында қара нарыққа 500 мыңға жуық синтетикалық наркотиктердің дозасы түспей қалды, деп хабарлайды aqshamnews.kz
Оқиға былай басталды. Алдымен дачный аймақта ақ түсті ұнтақ тәріздес заттан наркотиктер өндірілетін алты бөшке табылды. Тергеу барысында полиция қызметкерлері бұл бөшкелердің BMW X5 автокөлігіне тиелгенін анықтады, ал көліктің жүргізушісі 39 жастағы Қарағанды қаласының тұрғыны екен. Ер адам бөшкелерді жеке үйге жеткізбек болған кезде ұсталды.
«Үйде жүргізілген тінту барысында 1 тоннадан астам прекурсор және 10 кг-нан аса дайын альфа-PVP наркотиктері тәркіленді. Атап айтқанда, алты ағаш бөшкеде прекурсорлар, психотроптық затты кептіру процесінде болатын сұйықтықпен толтырылған 35 әйнек поддон, белгісіз сұйықтық бар 33 канистра, ұнтақ түріндегі затпен толтырылған төрт сөмке, бес газқағар, үш вакуумды пакетте шамамен 3 кг дайын альфа-PVP наркотигі, наркотик өндіруге арналған құрал-жабдықтар (миксерлер, вакууматор, металл вентиляция бөлшектері), таразылар, мобильді телефондар, жүйелік блок және басқа да заңсыз әрекетке қатысы бар заттар табылды», - деп хабарлады ҚР ІІМ баспасөз қызметі.
Қазіргі уақытта күдікті уақытша ұстау изоляторына қамалып, сараптамалар жүргізілуде.