Бұл туралы Асхат Аймағамбетов өзінің Facebook-тегі парақшасында жазды.
Министр Алматыға жұмыс сапары барысында «Ғылым орда» орталығында болып, Ғылыми кітапхананың, мұрағаттың, сирек басылымдар қоймасының жұмысымен танысты, деп хабарлайды Almaty-akshamy.kz
Орталықтың құндылығы ерекше, себебі онда біздің ғылыми және мәдени мұрамыз, отандық ғалымдардың ғылыми-зерттеу және ағартушылық жұмыстары сақталған.
«Алматы трагедиясы» кезінде болған оқиғаларды ескере отырып, осындай өте құнды қорлардың сақталуын қамтамасыз ету өте өзекті. Оларды цифрландыруды жүргізу, резервтік көшірмелер жасауды, каталогтандыруды, қызметкерлерді оқытуды, қолжазбаларды және басқа да дереккөздерді ғылыми айналымға енгізуді, ежелгі құжаттарды қалпына келтіруді қамтамасыз ету қажет, сондай-ақ өткен оқиғалар аясында олардың сақталу қауіпсіздігін қамтамасыз ету де маңызды», - деп жазды Аймағамбетов.
Ведомство басшысы сапарының қорытындысы бойынша арнайы өнеркәсіптік сканерлерді, тозған құнды кітаптар мен ежелгі қолжазбаларды қалпына келтіруге арналған зертханалық жабдықтарды, сақтауға арналған арнайы сөрелер мен жәшіктерді, сондай-ақ қоймаларды қажетті температуралық жағдайлармен қамтамасыз етуге арналған жабдықтарды сатып алуға қаражат бөлу туралы шешім қабылданғанын хабарлады.
«Сондай-ақ, ғалымдармен бірге біз ғылыми орталықтың жұмысын жаңа деңгейге көтеру мәселесін талқыладық. Өз тарапымнан министрлік ғылыми жұмыстарды цифрландыру, білікті мамандарды тарту, Ұлттық мұрағат қоры материалдарының резервтік көшірмелерін жасау және жалпы осы орталықтың барлық өзекті мәселелерін шешу мәселелерін бақылауға алатынымызды атап өткім келеді», - деп жазды министр.