Алматы қаласының колледждері қазіргі заман ағымына сай дамып келеді. Осы орайда, 2025 жылдың 26 ақпанында №2 Алматы гуманитарлық-педагогикалық колледжінде кәсіби оқыту үдерісіне жасанды интеллект мүмкіндіктері сәтті енгізілуде, деп хабарлайды aqshamnews.kz
Аталмыш шара «Жұмысшы мамандықтары жылы» аясында ұйымдастырылған іс-шаралар жоспарын жүзеге асыру мақсатында өткен «Педагогикалық шеберлік мектебінің жұмысын ұйымдастыру» атты қалалық әдістемелік семинар барысында талқыланды.
Іс-шараның басты мақсаты – педагогтердің кәсіби құзыреттілігін арттыру және педагогикалық қызмет сапасын көтеруге бағытталған инновациялық әдістер мен тәжірибелерді талқылау. Семинарға Алматы қаласы Білім басқармасының Ғылыми-әдістемелік жаңа технологиялар орталығының (ҒӘЖТО) Техникалық және кәсіптік білім беру (ТжКБ) бөлімінің өкілдері, мемлекеттік колледж директорларының әдістемелік жұмыс жөніндегі орынбасарлары, әдіскерлер мен оқытушылар қатысты. Қатысушылар педагогикалық шеберлік мектебін тиімді ұйымдастыру және білім беру үдерісіне жасанды интеллектіні енгізу мәселелері бойынша тәжірибе алмасты.
Семинар аясында «Цифрлық білім беру ресурстары мен жасанды интеллект құралдары арқылы білім алушылардың функционалдық сауаттылығын қалыптастыру және бағалау» тақырыбында шеберлік сабағы өткізілді. Шара барысында спикерлер жасанды интеллектіні білім беру саласында сәтті қолдану тәжірибесімен бөлісті. Тренингтің тәжірибелік бөлімі педагогтерге білім алушылардың функционалдық сауаттылығын арттыруға ықпал ететін заманауи цифрлық құралдармен танысуға мүмкіндік берді.
Техникалық және кәсіптік білім беру бөлімінің басшысы Гүлнара Жәлелқызы Сүлейменованың айтуынша, бұл семинар педагогикалық тәжірибе алмасудың өзектілігі мен қажеттілігін көрсетіп, кәсіби қарым-қатынасты нығайтуға, әрі педагогикалық шеберлікті жетілдіру саласында одан әрі ынтымақтастық орнатуға негіз болады.
Қалалық әдістемелік семинардың өткізілуі туралы толық ақпаратты колледждің ресми сайтынан оқи аласыз: https://pedcollege2.edu.kz/