13 мұғалім тек қағаз жүзіндегі жалақыны алып отырған.
Облыстық Антикор департаменті Алматы облысының білім беру саласында «жоқ жандарға» 609 миллион теңгеден астам қаржы аударылғаны туралы мәлімдеді, деп хабарлады Almaty-akshamy.kz.
Осы фактілер бойынша алты есепшіге қатысты қылмыстық іс қозғалды. Олардың бірі бұған дейін сотталып, алты жылға бас бостандығынан айырылған. 81 млн теңге залал толығымен өтелді, деп түсіндірді ведомство.
Сондай-ақ есепшілер мұғалімдермен сөз байласып, жалақыны көбейткен төрт факті анықталды. Мұндай бұзушылықтардың жалпы сомасы 81 миллион теңге болды.
«Бір факті бойынша есепші мен төрт мұғалім 3 жылдан 6 жылға дейін бас бостандығынан айырылып, қылмыстық жауапкершілікке тартылып, келтірілген 62 миллион теңге залал толығымен өтелді» деп жазды Антикор.
Мамандардың айтуынша, мектеп қызметкерлерінің ақшасын осылайша ұрлау мүмкіндігі қазынашылық деректер базасымен Parus-Kaz және 1С жүйелерінде сәйкестіктің жоқтығынан болған.