28 шілдеде Шымкент қаласының мамандандырылған қылмыстық істер жөніндегі ауданаралық сотында қала әкімінің орынбасары Руслан Берденовке жасалған қастандыққа байланысты алдын ала сот отырысы өтті, - деп хабарлайды Аqshamnews.kz тілшісі.
Жәбірленуші сотқа келмеді
Руслан Берденов сот отырысына қатыспағаны белгілі болды. Оның өкілі Жеңіс Тыныбектің айтуынша, жәбірленуші қазір ем қабылдап жатыр.
Негізгі сот отырысы
Бұл іс бойынша басты сот талқылауы 6 тамызда сағат 10:00-ге белгіленген.
Күдікті – Ернар Жиембай
Бұл іс бойынша Ернар Жиембай күдікті ретінде танылып отыр. Алдын ала тыңдау ашық түрде өткен. Алайда судья сотталушының өз бейнесінің түсірілуіне қарсы екенін мәлімдеді.
Еске салайық, сотқа ҚР Қылмыстық кодексінің 24-бабы 3-бөлігі мен 99-бабы 1-бөлігі ("Кісі өлтіруге оқталу") бойынша іс түскен болатын.
Әйелінің мәлімдемесі
Бұған дейін күдіктінің әйелі Луиза Алданова Instagram-парақшасында болған жағдайға қатысты пікір білдірген. Кейбір БАҚ-тың мәліметінше, күдікті бұған дейін "Тұрғын үй Шымкент" ЖШС-ін басқарған.
Қастандық оқиғасы
Айта кетейік, 2025 жылғы 21 сәуірде Шымкент қалалық әкімдігі ғимаратының маңында Руслан Берденовке оқ атылған. Шенеунік жарақат алып, ауруханаға жатқызылды. Күдікті оқиға орнында ұсталды.
Оқиғадан кейін әлеуметтік желілерде шабуылдың себептері туралы түрлі нұсқалар тарады. Оның ішінде оқиғаның тұрмыстық сипатта екені, тіпті көреалмаушылық пен қызғаныш негізінде болғаны туралы да болжамдар айтылды.