Қазақстанда дәрі-дәрмек тапшылығына жол бермеу және бағаның негізсіз өсуін қатаң бақылауға алу тапсырылды, - деп хабарлайды Аqshamnews.kz тілшісі.
Үкімет отырысында премьер-министр Олжас Бектенов қазақстандықтарды дәрімен қамтамасыз ету ісінде әлі де тәуекелдер барын атап өтті. Әсіресе жылдың басында логистика мен сатып алу рәсімдерінің созылуы салдарынан қиындықтар туындайтынын айтты. Оның сөзінше, көптеген науқастар үшін дәріні үзіліссіз қабылдау өмірлік маңызды.
Премьер-министр бұл мәселелерді шешу үшін денсаулық сақтау саласына цифрлық құралдар енгізіліп жатқанын, дәріханалардағы дәрі қоры мен қолжетімділігін бақылауға мүмкіндік беретін ақпараттық жүйе іске қосылатынын жеткізді.
Бектенов Денсаулық сақтау министрлігіне «СК-Фармация» және өңірлердің әкімдіктерімен бірлесіп, келесі жылға арналған дәрі-дәрмек пен медициналық бұйымдарды уақытылы сатып алуды және үздіксіз жеткізуді қамтамасыз етуді тапсырды.
Сонымен қатар, премьер министрлікке монополияға қарсы органмен бірге дәрі-дәрмектің бөлшек сауда сегментінде бағалардың негізсіз қымбаттауына жол бермеу жөнінде шаралар қабылдауды жүктеді.