ҚР Бас прокурорының орынбасары Ғалымжан Қойгелдиев экс-сенатор Қайрат Қожамжаровқа қатысты қозғалған іс жөнінде түсініктеме берді, - деп хабарлайды Aqshamnews.kz.
Оның айтуынша, қазіргі уақытта қылмыстық іс тергеу сатысында.
«Қожамжаровқа қатысты іс қозғалды, тергеу амалдары жүргізілуде. Тергеу аяқталғаннан кейін тиісті процессуалдық шешім қабылданады. Қазіргі таңда оның процессуалдық мәртебесі айқындалған жоқ», – деді Ғ. Қойгелдиев Парламент Мәжілісінде журналистердің сауалына жауап бере отырып.
Еске сала кетейік, 2025 жылғы қыркүйек айының басында Экономикалық қылмысқа және сыбайлас жемқорлыққа қарсы күрес агенттігінің бұрынғы төрағасы Қайрат Қожамжаровқа қатысты сотқа дейінгі тергеп-тексеру басталғаны белгілі болды.
Ол лауазымдық өкілеттігін асыра пайдаланды және әртүрлі кезеңдерде қылмыстық жолмен алынған қаражатты заңдастырды деген күдікке ілінген.