Түркістан облысындағы Жетісай аудандық сотында қарт әкесін жүйелі түрде соққыға жықты деп айыпталған ер адамға қатысты резонансты іс аяқталуға жақын. 15 қаңтарда айыпталушы соңғы сөзін айтты, деп хабарлайды Аqshamnews.kz тілшісі.
Сот отырысы барысында айыпталушы эмоциясын жасыра алмай, жылап жіберді. Ол өз кінәсін толық мойындап, көпшілік пен туыстарынан кешірім сұрады.
"Баршаңыздан, бүкіл қазақ халқынан кешірім сұраймын. Істеген ісіме шын жүректен өкінемін. Туыстарымнан кешірім өтінемін. Ашуға беріліп кеттім. Өмір бойы өкініп өтемін. Қателестім. Барша мұсылман халқынан кешірім сұраймын. Мені түсініп, кешірулеріңізді өтінемін. Кінәмді толық мойындаймын", – деді ол сотта.
Бұған дейін прокурор айыпталушыға 6 жыл 2 ай бас бостандығынан айыру жазасын сұраған.
Бұл іс өткен жылдың қыркүйегінде әлеуметтік желіде тараған видеоға байланысты қоғам назарын аударған. Кадрларда ер адамның өз ауласында қарт әкесін аяусыз соққыға жыққаны бейнеленген. Бейнежазбаны көрші әйел жасырын түрде түсірген.
Видеода қарияның беті қанға боялғаны, өздігінен тұра алмаған соң, ұлының әйелін шақырып, екеуінің оны үйге алып кіргені көрінеді. Кейінірек қарт кісінің қайтыс болғаны белгілі болды.
Полиция ерлі-зайыптыға қатысты қылмыстық іс қозғағанымен, әйелге "ұрып-соғу" бабы бойынша қозғалған іс дәлелдің жеткіліксіздігіне байланысты тоқтатылған.