Әлеуметтік желіде татами үстінде "Балқадиша" әнін орындаған жасөспірімнің видеосы миллионнан астам қаралым жинап, көпті тәнті етті. Aqshamnews.kz тілшісі жұртты сүйсінткен баланың әкесімен сұхбаттасты.
"Спортпен қатар, өнер байқауларынан құр қол келмейді"
Көпшілікті даусымен тәнті еткен видеодағы баланың есімі – Бекболат Иса Ілиясұлы. Атырау қаласы, Алмалы ауылының тумасы. Исаның ата-анасы домбырашылар екен. Өнерлі отбасынан шыққан 14 жастағы жеткіншек 2019 жылдан бері дзюдо спортын жанына серік еткен.
«Мен де, жұбайым да спорттан алыс жандармыз. Керісінше өнер адамдарымыз. Ұлым Исаның бойындағы өнер бізден дарыған болуы керек. 8 жасында өзінің қалауымен дзюдо спортына берген болатынмын. Содан бері бірнеше жарыстарға шығып, жүлделі орындар алып келеді. Ал мектепте музыка пәнінің мұғалімі ән байқауларына да қатыстырып тұрады. Өнер байқауларынан да құр қол келген емес» дейді Исаның әкесі Ілияс мырза.
"Жылы лебіз білдіргендерге көп рақмет!
Ілияс мырза ұлының өнеріне тамсанып жатқан көпшілікке алғысын білдірді.
«Қазақта «жігітке жеті өнер де аз» деген сөз бар ғой. Сол секілді ұлымыз қай саладан болмасын үлкен жетістіктерге жетіп жатса ата-анасы ретінде біз әрдайым сөзсіз қуанышты боламыз. Желіде Исаның ән айтқан видеосына ақ тілектерін арнап жатқан жандарға үлкен алғысымды айтамын. Ұлым болашақта кім болғысы келетінін өзі таңдайды. Баланың таңдауына қарсы келмеу керек. Біз оны әрқашан қолдауға әзірміз» деді Ілияс мырза.
