Бахтияр жарады
Бахтияр Адамжан әлем сахнасын бағындырды, деп хабарлайды Almaty-akshamy.kz.
Қазақстандық балет артисі Бахтияр Адамжан Рим операсы мен Арена ди Верона сахнасында өнер көрсетіп, Италияның талғампаз көрерменінің жүрегін жаулады.
«Астана Опера» театрының жетекші солисі, Қазақстанның еңбек сіңірген қайраткері бүгінде шетелде жақсы танымал.
Балет өнерін кәсіп еткен қазақ баласы жайлы шетелдік басылымдар жарыса жазып, оның өнерін жоғары бағалады. «15 мың көрермен сыятын Арена ди Верона антикалық амфитеатрының атмосферасы ерекше», – дейді жерлесіміз.
«Көптеген шақырту түсіп жатты, бірақ оның барлығы ысырылып, уақытын ауыстыра берді. Десе де, сапарымызды мамыр айынан бастап кеттік. Бірінші көрші Ресей мемлекетіне барып келдім, содан кейін, міне, көптен күткен Италияға да жеттім. Рим қаласына бардым. Біздің Италияға гастрольдік сапарымыз Верона аренасынан басталды. Бұл әйгілі «Ласкаланың этуалі», «Роберто Болле және оның достарының» гала-концерті болды. Үлкен фестиваль осы балетпен аяқталды», - деді «Астана Опера» театрының жетекші солисі Бахтияр Адамжан.
Веронадағы фестивальден кейін отандық балет артисі Италия көрерменімен 14, 15, 16 қыркүйек күндері қайта қауышқан. Онда ол көрнекті хореограф Ролан Петидің «Құдай Ана соборы» қойылымының Рим операсындағы тұсаукесерінде Квазимодо партиясын таныстырған. Еуропада қазақ балетінің деңгейін көрсетіп қайтқан Бахтияр Адамжан отандық көрермендермен сағынысып көрісті.