Алматы қаласында «Балалар қауіпсіздігі – ортақ міндетіміз» атты жалпықалалық ата-аналар жиналысы өтті. Аталған шараны Алматы қаласының Білім басқармасы, Психологиялық қолдау орталығы, прокуратура, полиция және психикалық денсаулық мекемелері бірлесіп ұйымдастырды.
Жиын гибридті форматта өтті: 216 ата-ана офлайн қатысып, 2880 адам Zoom платформасы арқылы қосылды.
Басты мақсат – ата-аналарды баланың қауіпсіздігін қамтамасыз етуге қатысты маңызды мәселелермен таныстыру. Атап айтқанда: зорлық-зомбылықтың алдын алу, киберқауіпсіздік, гаджеттерді дұрыс пайдалану, есірткі мен құмар ойындарға тәуелділіктің қаупі, буллинг пен суицидтік мінез-құлықты болдырмау жолдары, сондай-ақ ҰБТ кезінде ата-аналарға психологиялық қолдау көрсету тәсілдері қамтылды.
Алматы қаласы Білім басқармасының басшысы Сайран Тапенұлы Сайфеденов шараны ашып, бала қауіпсіздігін қамтамасыз етуде мектеп пен ата-ананың бірлесіп жұмыс істеуінің маңыздылығына тоқталды. Ол балалардың құқық бұзушылығы мен жарақаттануын болдырмау мәселелерін ерекше атап өтті.
Жиында түрлі сала мамандары мен сарапшылар өз тәжірибелерімен бөлісіп, ата-аналарға нақты ұсыныстар берді. Ашық диалог алаңы ретінде ұйымдастырылған бұл кездесу мектеп пен ата-ана арасындағы сенімді нығайтып, балалардың амандығы үшін бірігіп жұмыс істеудің тиімді жолдарын ұсынды.