Отырар ауданындағы автоматтандырылған дәріхана-тарату пунктінің қызметі пилоттық жоба ретінде таратылады, деп хабарлайды Almaty-akshamy.kz Inform.kz-ке сілтеме жасап.
ҚР Денсаулық сақтау министрі Ажар Ғиният Түркістан облысына жұмыс сапары аясында 48 мың адамға қызмет көрсететін Отырар ауданының орталық ауруханасында болды. Ол дәрігерге дейінгі кабинетпен және емхананың жалпы практика дәрігерлерінің жұмысымен танысты, автоматтандырылған дәріхана-тарату пунктін көрді.
Бұл аппарат, ең алдымен, пациенттерге дәрі-дәрмектерді тәуліктің кез келген уақытында, медицина қызметкерлерінің қатысуынсыз өз бетінше алуға, адам факторын қоспағанда, АДҚ тізбесі бойынша дәрі-дәрмектерді бөлудегі ашықтықты қамтамасыз етуге мүмкіндік береді.
Министр цифрландыру жөніндегі құрылымдық бөлімшеге осы тәжірибені зерделеуді және пилоттық жоба ретінде енгізуді тапсырды.