Денсаулық сақтау министрлігінің мәліметіне сүйенсек, бүгінгі күні дәрілік заттар мен медициналық бұйымдардың мемлекеттік тізілімінде дәрілік заттардың 6925 сауда атауы тіркелген. Олардың арасында көлік құралдарын басқарар алдында қолдануға тыйым салынған қандай дәрілер бар. Аlmaty-akshamy.kz тілшісі зерттеп көрді
Сонымен, көлік жүргізер алдында орталық жүйке жүйесіне әсер ететін препараттарға тыйым салынады.
«Автокөлікті басқару немесе жөндеу жұмыстары кезінде мидың істеу қабілетіне әсер ететін басқа да дәрілік топтар бар. Кейбір дәрі-дәрмектер көлік жүргізу қабілетіне бірден әсер етуі мүмкін, кейде оны қабылдағаннан күннен кейінгі күні де әсері тарқамауы мүмкін. Бұл әсерлер рецепт бойынша да, рецептсіз де дәрі-дәрмектерді қабылдау кезінде пайда болуы мүмкін. Әсерлер көбінесе алкогольді бір мезгілде қолданғанда немесе басқа дәрі-дәрмектермен қосымша әрекеттескенде күшейеді. Нәтижесінде шаршау, бас айналу, көздің алды бұлыңғырланып немесе көру қабілетінің бұзылуы, ұйқы келтіру, денені құрыстыру және т.б. сияқты белгілер пайда болуы мүмкін», - дейді дәрігерлер.
Олардың айтуынша, көбінесе дәрі-дәрмектерді қабылдаудан болатын қауіпті ескере бермейді.
«Әсіресе, ем алуды бастаған кезде сақтанған жөн. Оған дозаның өзгеруі немесе дәрі-дәрмектің өзгеруі әсер етеді. Автокөлікті басқару кезінде кері әсер етуі мүмкін кейбір дәрілік топтардың тізімі: анальгетиктер (ауырсынуды жеңілдету үшін қолданылатын дәрілер); антидепрессанттар (ауыр депрессиялық бұзылуларды емдеу үшін қолданылатын дәрілер); диабетке қарсы препараттар (қандағы глюкозаны төмендету арқылы қант диабетін емдеу үшін қолданылатын дәрілер); эпилепсияға қарсы препараттар (эпилепсиялық ұстамаларды емдеу үшін қолданылатын дәрілер); антигистаминдер (аллергияны емдеу үшін қолданылатын дәрілер); гипертензияға қарсы препараттар (жоғары қан қысымын емдеу үшін қолданылатын дәрілер); анксиолитиктер (мазасыздықты емдеу үшін қолданылатын дәрілер); ұйықтататын дәрілер (ұйқы проблемаларын шешу үшін қолданылатын дәрілер); антипсихотиктер", - деп атап өтті Денсаулық сақтау министрлігі.
Сонымен қатар, Қазақстан Республикасы Денсаулық сақтау министрлігінің Медициналық және фармацевтикалық бақылау комитеті қазіргі уақытта автокөлікті жүргізу кезінде медициналық дәрілерді ішуге тыйым салынған препараттардың толық тізімі жоқ екенін хабарлады
"Тіркелген дәрілік заттар бойынша ақпаратты ndda.kz сайтынан және darikz мобильді қосымшасында танысып шығуға болады. Сонымен қатар, көлік құралын басқару кезінде ішуге тыйым салынған дәрілік заттардың тізбесі жоқ", - деп толықтырды ведомство. Сонымен қатар, әрбір дәрі-дәрмектің қарсы көрсетілімдерін мұқият оқып шығуға кеңес берді.