Атырау облысында 4 246 жеке тұлға көлік салығын белгіленген мерзімде төлемеген. Соның салдарынан өңірде 321 млн теңге көлемінде берешек жиналған, – деп хабарлайды aqshamnews.kz тілшісі.
Облыстық Мемлекеттік кірістер департаментінің дерегінше, қарыздың 226 млн теңгесі негізгі берешек болса, 95 млн теңгесі кешіктірілген төлем үшін есептелген өсімпұл. Бұдан бөлек, мүлік салығы бойынша 10 415 азаматтың 50 млн теңге қарызы тіркелген.
Ережеге сай, жеке тұлғалар көлік салығын жыл сайын 1 сәуірге дейін тұрғылықты жері бойынша төлеуі тиіс. Ал мүлік салығын өтеудің соңғы мерзімі – 1 қазан. 2025 жылға есептелген мүлік салығы 2026 жылдың 1 қазанына дейін төленуі қажет.
Департамент түсіндіргендей, салық уақытында төленбесе алдымен ескерту-хабарлама жіберіледі. Қарыз өтелмеген жағдайда салық бұйрығы шығарылып, іс жеке сот орындаушыларына жолданады. Одан кейін мәжбүрлі өндіріп алу шаралары қолданылуы мүмкін.
Биылдан бастап салық салу тәртібіне де өзгерістер енгізілген. Енді жеңіл көлік 10 жылдан асса, есептелетін салық 30% төмендейді. Ал 20 жылдан асқан автокөліктер үшін төлем мөлшері 2 есе азаяды. Сонымен қатар шаруа қожалықтары бір пикап көлігі үшін салық төлеуден босатылған.
Қымбат мүлік иелеріне қатысты жаңа талап та күшіне енді: егер азаматтың барлық жылжымайтын мүлкінің жиынтық құны 450 млн теңгеден асса, осы сомадан асқан бөлігіне 2% қосымша салық салынады.
Салық органдары тұрғындарды төлемдерді кешіктірмей өтеуге шақырып отыр. Себебі берешек ұлғайған сайын өсімпұл да көбейіп, іс сот орындаушыларының қарауына өтуі мүмкін.