Атырауда жүргізуші куәлігі жоқ 18 жастағы жігіт полициядан қашпақ болып, үйінің ауласына кіріп кеткен, – деп хабарлайды aqshamnews.kz тілшісі.
Полицияның мәліметінше, оқиға 28 наурыз күні болған. Lada Priora көлігін басқарған жас жігіт тәртіп сақшыларының тоқтау туралы талабына бағынбай, көлікті үйіне қарай айдап кеткен.
Белгілі болғандай, сол сәтте қақпа алдын ала ашық тұрған. Көлік аулаға кіре салысымен жүргізушінің анасы патрульдік көлікті ішке кіргізбеу үшін қақпаны дереу жауып тастаған.
Жүргізушіге көлік құралын жүргізу құқығынсыз басқарғаны және полиция қызметкерлерінің заңды әрекетіне кедергі келтіргені үшін жаза тағайындалды. Сот шешімімен ол 10 тәулікке әкімшілік қамауға алынды.
57 жастағы анасы да полиция қызметкерлерінің әрекетіне кедергі келтіргені үшін әкімшілік жауапкершілікке тартылды.
Сонымен қатар көлікті жүргізу құқығы жоқ адамға тізгінді берген Lada Priora иесі де жазаланды. Полицияның мәліметінше, көлік иесі құқық бұзушының ағасы болып шыққан.
Сондай-ақ полиция департаменті жігіт оқитын оқу орнына профилактикалық шаралар қабылдау жөнінде ресми ұсыныс жолдағанын мәлімдеді.