Жақында "Alatau-Aqparat" медиахолдингінде "Атырау-Ақпарат" ЖШС директорының орынбасары Серік Қабдолов келді.
Кездесу барысында тараптар медиа саласындағы өзара іс-қимылды нығайту, өңірлік ақпарат кеңістігін дамыту және заманауи технологияларды енгізу бағытындағы тәжірибені бөлісті. Әсіресе, жасанды интеллектіні редакциялық жұмысқа енгізу тәжірибесі туралы ақпарат берілді.
Қонаққа "Alatau-Aqparat" құрамындағы сайттар мен басылымдардың, сондай-ақ әлеуметтік желілердегі ақпараттық жұмыстар қалай ұйымдастырылып жатқаны және жасанды интеллект құралдарының редакциялық процестерге қалай интеграцияланғаны таныстырылды. Серік Қабдолов бұл бағыттағы жұмыстардың медианың сапасы мен жеделдігін арттыруға ықпал ететінін атап өтті.
Кездесу соңында тараптар өзара ынтымақтастық туралы меморандумға қол қойды. Құжат аясында ақпарат алмасуды жүйелеу, бірлескен жобалар мен аймақтық медианың дамуына серпін беретін бастамаларды іске асыру көзделген.
Серік Қабдолов өз кезегінде "Атырау-Ақпарат" пен "Alatau-Aqparat" арасындағы әріптестіктің екі өңірдің медиа кеңістігіне жаңа серпін беріп, кәсіби тәжірибе мен идея алмасудың тиімді алаңына айналатынына сенім білдірді.
Ал "Alatau-Aqparat" медиахолдингінің бас директоры Ержан Қалымбайұлы әріптес ұйымдармен осындай тәжірибе алмасу кездесулері өңірлік журналистиканың дамуына, заманауи медиа үрдістерді меңгеруге және ақпараттық саясатты жаңа деңгейге көтеруге жол ашатынын атап өтті.