Алтыжақты форматтағы ынтымақтастықтың келешегі талқыланады.
14 қазан күні елордада «Орталық Азия-Ресей» саммиті өтеді. Бұл туралы ҚР Сыртқы істер министрлігінің ресми өкілі Айбек Смадияров айтты, деп хабарлайды Almaty-akshamy.kz ҚазАқпаратқа сілтеме жасап.
«Жоғары деңгейдегі кездесу барысында Қазақстан, Қырғызстан, Өзбекстан, Тәжікстан, Түрікменстан және Ресей президенттері алтыжақты форматтағы ынтымақтастықтың келешегін талқылайды. Кездесу қорытындысы бойынша мемлекет басшыларының Бірлескен мәлімдемесін қабылдау жоспарлануда, онда Еуразиялық кеңістіктегі өңірлік ынтымақтастықтың өзекті мәселелері көрсетіледі», - деді Айбек Смадияров министрлікте өткен брифингте.
Сондай-ақ қорытынды құжатта саясат пен қауіпсіздік, сауда-экономикалық және мәдени-гуманитарлық ынтымақтастық сияқты салалардағы одан әрі өзара іс-қимылдың перспективалары атап өтіледі.
Айта кетейік, бұл аптада елордада Азиядағы өзара іс-қимыл және сенім шаралары жөніндегі кеңестің VI саммиті өтеді, оған 11 мемлекеттің басшылары қатысады.
Сонымен бірге, 14 қазанда Астанада ТМД мемлекеттерінің басшылары кездеседі. Саммитте Қазақстан 2023 жылы ТМД-ға төрағалық етуді Қырғыз Республикасына тапсырады.