Астанада мас күйінде көпірге шыққан ер адам 15 тәулікке қамалды, деп хабарлайды Aqshamnews.kz тілшісі.
Астана қаласының мамандандырылған әкімшілік соты Қылмыстық емес құқықбұзушылықтар туралы кодекстің 434-бабының 1-бөлігі (ұсақ бұзақылық) бойынша азамат Б.-ға қатысты әкімшілік істі қарады.
Іс материалдарына сәйкес, ер адам мас күйінде көпір конструкциясына шығып, қоғамдық тәртіпті бұзған және айналасындағыларға ашық түрде құрметсіздік көрсеткен. Әлеуметтік желілерде тараған ақпаратқа қарағанда, оқиға «Сарайшық» көпірінде болған.
Құқықбұзушылық фактісі полиция хаттамасымен, куәгердің айғақтарымен және оқиға орнындағы бейнежазбамен расталды.
Сот отырысында азамат Б. өз кінәсін толық мойындап, жасаған әрекетіне өкінетінін айтты.
Заңға сәйкес, бұл бап бойынша 20 АЕК көлемінде айыппұл немесе 5-тен 15 тәулікке дейін әкімшілік қамау көзделген.
Сот құқықбұзушылықтың сипатын, оның қоғамдық қауіптілігін, айыпталушының мінез-құлқын және өкінуін және мас күйде бол факторларды ескере отырып, ең жоғарғы жаза - 15 тәулік әкімшілік қамау тағайындады.
Шешім әлі заңды күшіне енген жоқ.