Астанада 55 жастағы ер адам төсекке таңылған қарт анасын өлтіріп, қылмысын жасыру үшін жедел жәрдем шақырғаны анықталды, деп хабарлайды Aqshamnews.kz тілшісі.
Іс материалдарына сәйкес, оқиға 2025 жылғы 3 шілдеде болған. Тергеу нұсқасы бойынша, ер адам анасының мойнын қысып, тұншықтырған. Кейін «анасын сүлгіге асылып қалды» деп түсіндіріп, жедел жәрдем шақырғаны айтылады.
Оқиға орнына келген медицина қызметкері әйелдің көз жұмғанын анықтап, беті мен мойнынан көгерген іздерді байқаған. Сараптама қорытындысы өлімнің негізгі себебі тұншығу екенін көрсеткен, сондай-ақ денесінде бірнеше жарақат тіркелген.
Сот ер адамның кінәсі толық дәлелденді деген қорытындыға келіп, оны ҚР ҚК 99-бабы 1-бөлігі («Адам өлтіру») бойынша 11 жылға бас бостандығынан айыру жазасына кесті. Жаза орташа қауіпсіздік мекемесінде өтеледі.