Фитосанитариялық бақылау жүргізу барысында өсімдіктер карантині саласында 1 723 бұзушылық анықталды.
Ауыл шаруашылығы министрлігінің мемлекеттік инспекторлары заңды бұзған экспортерларға айыппұл салды, деп хабарлайды Almaty-akshamy.kz.
Мамандардың айтуынша, экспортерлар көп жағдайда өнімді фитосанитариялық сертификатсыз алып жүрген. Сонымен қатар, қаптамаларында таңбалау болмайды, фитосанитарлық сертификат талаптарына сәйкес келмейді және фитосанитарлық талаптар бұзылған.
«150 жағдайда карантиндік объектілер анықталған. 403 жағдайда карантинге жатқызылған өнім экспорттаушы елге қайтарылды, тағы 8 жойылды. Сонымен қатар, 1 406 жеке және заңды тұлғалар әкімшілік жауапкершілікке тартылып, 92 401 241,0 теңге көлемінде айыппұл салынды. Әзірбайжан елінен жеткізілген қызанақ жемістеріне карантиндік фитосанитариялық бақылау жүргізу кезінде 17 жағдайда Tomato brown rugose cfruit virus (ToBRFV) вирусы анықталды. Осыған байланысты Комитет тарапынан Әзірбайжан аумағынан қызанақ жемістерін әкелуге шектеу түрінде уақытша карантиндік фитосанитариялық шара енгізілді», – делінген АШМ баспасөз қызметінің хабарламасында.
Заңнамаларды басшылыққа ала отырып және Әзірбайжан Республикасының Азық-түлік қауіпсіздігі жөніндегі агенттігінен келіп түскен карантинге жатқызылған өнімді Қазақстан Республикасының аумағына әкелудің алдын алу бойынша қабылданған және қабылданатын шаралар туралы ақпараты назарға алынып, 2021 жылғы 21 қаңтардан бастап осы шектеу алынып тасталды.
Сондай-ақ, жыл басынан бері Түркменстанның өсімдіктер карантині жөніндегі мемлекеттік қызметінің фитосанитариялық сертификаттарының сүйемелдеуімен Қазақстанға жеткізілетін қызанақтарға карантиндік фитосанитариялық бақылау жүргізу кезінде «қоңыр әжім» вирусының (Tomato brown rugose fruit virus (ToBRFV) 19 дерегі анықталған.
Карантиндік объектілердің жүйелі түрде анықталуына және ЕАЭО бірыңғай карантиндік фитосанитариялық талаптарының бұзылуына байланысты, ҚР АШМ АӨК мемлекеттік инспекция комитеті 2021 жылдың 7-маусымынан бастап Түркменстан аумағынан қызанақ пен бұрыш өнімдерін әкелуге тыйым салу түрінде уақытша карантиндік фитосанитариялық шараларды енгізді.