Қазақстан футболының көшбасшы ойыншыларының бірі Асхат Тағыберген ұлттық құрамадан кететінін мәлімдеді.
Бұл туралы Солтүстік Македониямен болған ойыннан кейін өткен баспасөз мәслихатында бас бапкер Әли Әлиев хабарлады.
Астана қаласында өткен матч 0:1 есебімен қонақтардың жеңісімен аяқталды, деп хабарлайды aqshamnews.kz.
34 жастағы жартылай қорғаушының бұл шешімі тек команда үшін ғана емес, бүкіл ел үшін де күтпеген мәлімдеме болды.
Асхат Қазақстан құрамасында 2014 жылы алғаш рет өнер көрсетті. Ал 2021 жылы капитандық міндетті өз мойнына алып, команданың тірегіне айналды. Осы уақыт аралығында ол 63 матч өткізіп, 3 гол соғып, 7 нәтижелі пас берген.
Ол Уэльс пен Сан-Марино құрамаларына гол соқса, Дания қақпасына соққан аты аңызға айналған голы арқылы ФИФА-ның Пушкаш сыйлығына ұсынылды. Әрине, марапат қолына тимеді, бірақ бұл сәт ел футболының алтын қорына енді.
Асхат – Пушкаш сыйлығына ұсынылған Қазақстанның алғашқы әрі әзірге жалғыз футболшысы. Оның Дания қақпасына бағыттаған зымырандай соққысы әлі күнге дейін жанкүйерлердің есінде.
"Мен құраманың жолында барымды салдым. Енді эстафетаны жас ойыншыларға тапсыратын кез келді. Осы жылдар ішінде қолдау білдірген бапкерлерге, әріптестеріме және жанкүйерлерге алғысым шексіз. Бұл – өмірімдегі ерекше кезең болды", – деді Асхат матчтан кейін.
Асхат әзірге клуб деңгейінде өнерін жалғастырып жатыр. Ол әлі де жоғары деңгейде ойнап, жас буынға үлгі болуда. Ұлттық құрамадағы мансабын аяқтау кәсіби тұрғыда салмақты шешім, әрі нағыз спорт шеберіне лайық қадам.
"Тағыберген – үлгі боларлық ойыншы. Ол футболмен өмір сүрді, әрдайым команда үшін жанын салды. Біз оның алаңдағы көшбасшылығын сағынатын боламыз", – деді Әли Әлиев.
Жанкүйерлер Асхатқа шын жүректен алғыстарын білдіруде. Оның ерен еңбегі, адалдығы мен эмоцияға толы ойындары Қазақстан футболының тарихында мәңгі сақталады.