Алматы қаласы «Ерте араласу әлеуметтік қызметтер орталығы» балалар мен олардың қамқор отбасы үшін жылы атмосфераға толы «Әрқашан күн сөнбесін!» атты инклюзивті мереке ұйымдастырды. Іс-шара орталық аумағында өтті.
Балалар мейрамында ерекше балалардың емін-еркін ойнап күлуіне, дамыту, қолдау іс-шараларына түгел қатысуына мән берілді. Нақтырақ айтсақ, бүлдіршіндерге арналған интерактивті аймақ, түрлі-түсті бормен асфальтқа сурет салу, дамытушы ойындар, аниматорлардың өнер көрсетуі мен музыкалық нөмірлер ұйымдастырылды.
Сондай-ақ, орталық мамандары ата-аналарға ерте жастағы даму кідірістерін анықтау мен түзету туралы кеңес беретін бұрыш ұйымдастырды.
_”Әр бала, өз ерекшелігіне қарамастан, бақытты күндер кешуге және толыққанды балалық шаққа құқылы. Біздің орталықтың мақсаты — отбасыларға уақытылы қолдау көрсету, болашаққа деген сенімін үстей түсу”, – дейді Алматы қаласы Ерте араласу орталығының директоры Нұрзия Әлімбекова.
Іс-шараға орталықтың серіктес-демеушісі – Қазақ географиялық қоғамы мен «SAM» компаниясы үлкен қолдау көрсетті. Балаларға түрлі ойыншық, тәттілер көтере келген Қазақ географиялық қоғамының қызметкері Дәулет Омаров және «SAM» компаниясынан Сәуле Қадырбаева мен Әлішер Анарқұлов сөз сөйлеп, балдырғандарға бақыт, шаттық, денсаулық тіледі.
Бұл мереке балаларға қуаныш сыйлап қана қоймай, қоғамның ерте араласу мен инклюзияның маңыздылығын түсінуіне де ықпал еткені сөзсіз.
Мереке қамқорлық пен қуанышқа толы атмосферада өтті. Бала да, оның ата-анасы да дән риза болды.