Ақтауда тәртіп сақшылары жүк көлігінің қозғалысын жолға тікенді жолақ төсеп,тоқтатуға мәжбүр болды, деп хабарлайды Аqshamnews.kz. Polisia.kz-ке сілтеме жасап.
Жағдай қалай болды?
Оқиға 29 шілдеде, түнгі сағат 01:30 шамасында Ақтаудағы "Өмірзақ" өндірістік аймағында болды. Полицейлер жолдан DAF маркалы жүк көлігін байқаған. Жүргізушінің күмәнді әрекеттері тәртіп сақшыларының назарын аударған. Олар көлік иесіне тоқтау туралы талап қойғанымен, жүргізуші қашып кетуге әрекеттенген.
"Қуғын кезінде ол қарсы бағытқа шығып, жол белгілерін елемей, жолда қауіпті жағдайлар туғызды", – деп мәлімдеді полиция өкілдері.
Қуғынды тоқтату үшін полицейлер арнайы тікенді жолақ ("ёж") төсеп, көліктің қозғалысын баяулатып, тоқтатты. Жүргізуші дереу ұсталды.
Тәртіп бұзушы кім?
Анықталғандай, көлікті Түркістан облысының тұрғыны жүргізген. Ол жүк тасымалымен айналысатыны және көлікке тиісті құжаттары бар екені белгілі болды. Алайда ер адам медициналық куәландырудан бас тартқан.
Жүргізушіге қатысты келесі құқықбұзушылықтар бойынша материалдар жинақталды:
-
Полицияның заңды талабына бағынбау;
-
Маневр жасау ережесін және қарсы бағытқа шығу тәртібін бұзу;
-
Медициналық куәландырудан бас тарту;
-
Жол белгілерін елемеу және жолда апатты жағдай туғызу.
Қазіргі уақытта автокөлік айыптұраққа қойылып, іс материалдары сотқа жолданды.