Ақмола облысында қамқоршылық органдарының заңсыз әрекеттерін әшкереледі, деп хабарлайды Аqshamnews.kz тілшісі.
Облыстық прокуратураның мәліметінше, кісі өлтірген адам өз-өзіне жауап бере алмайтын тұлғаларға қамқоршы болған. Заңнамаға сәйкес қылмыс жасағандар немесе психикалық ауруы бар азаматтар еш жағдайда қамқоршы не қорғаншы бола алмайды. Алайда тексеріс барысында Ақмола облысында екі әрекетке қабілетсіз адамға кезінде кісі өлтіргені үшін сотталған тұлғаның қамқоршы болып бекітілгені анықталған. Сонымен қатар «шизофрения» диагнозы бар бір азамат та ресми түрде қамқоршы ретінде тіркелген.
Прокуратура тағы бір сорақы жайтты хабарлады: өңірде қайтыс болған 28 тұрғын әлі күнге дейін «әрекетке қабілетсіз» ретінде есептен шығарылмай, ресми тізімде тұрған.
Қадағалау органы бұл фактілер қамқоршылық жүйесіндегі ауыр кемшіліктерді көрсететінін және заң бұзушылықтарды жою бойынша шаралар қабылданатынын мәлімдеді.