Тиісті сараптама тағайындалды.
Түркістанда ақбөкендерді аулаған браконьерлер қолға түсті, деп хабарлайды aqshamnews.kz
Polisia.kz-тің мәліметінше, Созақ аудандық полиция бөліміне «Охотзоопром» инспекторынан хабарлама түскен. Ол аймақта жүрген белгісіз күдікті көлікті тексеру керектігін жеткізді. Оқиға орнына жедел жеткен сақшылар Қызыл кітапқа енген жабайы жануарларды заңсыз аулау дерегін анықтады.
«Жедел уәкілдер дер кезінде қабылдаған шаралар нәтижесінде күмәнді Toyota Land Сruizer көлігі, 16 дана ақбөкеннің ұшасы, 13 дана ақбөкеннің басы, 2 дана пышақ, 58 дана аңшы мылтығының оғы, дүрбі, аңшы мылтығы, 12 калибрлі, екі ұңғылы 2 мылтық, 4 дана жарықтандырғышты заттай дәлелдеме ретінде тәркіледі. Тиісті сараптама тағайындалды», -делінген ақпаратта.
Жергілікті тәртіп сақшылары көліктегі күдікке ілінген 4 ер адамды полиция бөліміне жеткізді. Олар Жамбыл облысының тұрғындары болып шықты.
Бұл жайт жануарлардың сирек кездесетін және құрып кету қаупі төнген, сондай-ақ пайдалануға тыйым салынған түрлерімен, олардың бөліктерімен немесе дериваттарымен заңсыз айналысу бойынша тіркеліп, оқиғаның мән-жайы анықталып жатыр.