Алматыда полиция кәмелетке толмаған жасөспірімді антиқоғамдық әрекеттерге тарту дерегі анықталған түнгі клубтың жұмысын тоқтатты, – деп хабарлайды aqshamnews.kz тілшісі Polisia.kz сайтына сілтеме жасап.
Полицияның мәліметінше, тексеру шаралары мен түскен материалдарды талдау барысында жасөспірімнің түнгі мекемеде болғаны расталған. Сондай-ақ оның құқыққа қайшы әрекетке тартылғаны тіркелген.
Құқық қорғау органдары бұл эпизод бойынша қажетті материалдар мен дәлелдер жиналғанын, соның негізінде қатаң шаралар қабылданғанын, оның ішінде клуб қызметін тоқтату туралы шешім шығарылғанын айтты.
Алматы полициясы қосымша түрде клубта кәмелетке толмағандарға бірнеше рет алкоголь берілгенін нақтылады. Ведомство дерегінше, персонал келушілердің жасын тексеру бойынша шара қолданбаған және спирттік ішімдікті сату кезінде тиісті сақтық танытпаған.
«Кәмелетке толмағандарды антиқоғамдық әрекеттерге тартудың кез келген фактісі, әсіресе түнгі ойын-сауық орындарында, біз үшін заңды өрескел бұзу болып саналады. Мұнда формалды көзқарасқа да, ескертуге де орын жоқ. Егер бизнес заң талабын елемей, балалардың қауіпсіздігін қатерге тіксе ол жабылады», — деді Алмалы аудандық полиция басқармасының бастығы Мақсат Пшан.
Еске салайық, бұған дейін Алматыдағы барлардың бірінен полиция күшті әсер ететін заттарды заңсыз сату дерегін анықтаған еді. Мекемеде «күлдіргі газ» атанатын азот тотығы сақталған металл баллондарға арналған арнайы жабдықталған орын табылған.