Әлеуметтік желі қолданушыларын елжіреткен Панч есімді кішкентай макака туралы оқиға әдемі жалғасын тапты. БАҚ мәліметінше, алты айлық кішкентай макаканы біртіндеп өзге маймылдармен таныстыра бастаған, – деп хабарлайды aqshamnews.kz тілшісі.
Желіде тараған жаңа кадрларда ересек макака Панчқа жақындап келіп, оның жүнін тазартып, паразиттерден арылуына көмектескені көрінеді. Мұндай әрекет макакалар әлемінде маңызды белгі саналады: бұл сенімнің, әлеуметтік қабылдаудың және үйірге етене араласа бастаудың нышаны.
Қолданушылардың айтуынша, бұл сәт «нағыз қабылдау» секілді әсер қалдырады Панчты ақыры өзіне "қамқоршы" тапқандай, ол бұрынғыдай сыртқа теппей, қасына жақындатқандай. Бұған дейін ол жиі шетте қалып, өзін қауіпсіз сезіну үшін сүйікті ойыншығын — жұмсақ орангутанды құшақтап жүретін. Ол ойыншық оған анасының орнын басқандай болған.
Жаңа фото мен видеолар желіде жылы пікірлер толқынын тудырды. Көпшілік Панчтың ересек макакаға «үмітке толы көзбен» қарап тұрғанын жазып, көз жасын әрең тежегендерін айтады.
Пікірлердің арасында "Шайға қант қосайын ба, әлде көз жасымды ма?", "Бұл шын ба өзі? ЖИ емес пе?", "Өте жүрекке жылы, жақсы жаңалық. Үмітке толы көзқарасы қандай…" деген жазбалар жиі кездеседі.