Қазақстан Төтенше жағдайлар министрлігі қыс мезгілінде ауа райы күрт нашарлаған кезде сақтық шараларын күшейтіп, дауылды ескертулерді қадағалауға және мүмкіндігінше алыс сапарларға шықпауға шақырды, деп хабарлайды AqshamNews.kz тілшісі ТЖМ мәлімдемесіне сілтеме жасап.
ТЖМ мәліметінше, қолайсыз ауа райы кезінде ауыл тұрғындарына ұзақ сапарлардан бас тарту ұсынылады. Дауылды ескертулер мен автожолдардың жабылуы туралы ақпарат тұрғындарға СМС-хабарламалар, интернет-ресурстар және әлеуметтік желілер арқылы жеткізіледі.
Министрлік қысқы кезеңде әлі қатпаған мұздың қауіпті екенін ескертіп, су айдындарында қауіпсіздік талаптарын қатаң сақтауға шақырды.
Қыс мезгіліндегі төтенше жағдайларға жедел ден қою үшін 44 мыңнан астам адам мен 14 мыңнан астам техникадан тұратын күш-құралдар тобы дайындалған. Өңірлерде 1 681 жылыту пункті әзірленіп, қосымша ретінде 40 трассалық медициналық-құтқару пункті де жылыту орны ретінде пайдаланылмақ.