Алматы қалалық Психикалық сауықтыру орталығының емделушілері «Балалық шақ қайда кетті?» деген қойылымды сахналап, көрерменге өнерін паш етті. Олар бұл көрініске 4 ай бойы дайындалып, Халықаралық балаларды қорғау күні қарсаңында кішкентай пациенттерге және медицина қызметкерлеріне ұсынды.
Науқас жасөспірімдерді театр өнеріне баулып, сахна төрінде өз бойындағы қорқынышпен күресуге және көпшілік алдында сөйлеуге жігерлендіріп жүрген арт- терапевт Дарияш Қасымова бұл қойылымда жасөспірімдер балалық шақпен қоштасып, ата-анаға перзентіне көңіл бөлудің маңызды екенін, жүрегіндегі тілегін естіртуге тырысады дейді.
”Олар ересектерді кәмелет жасқа толмағандардың пікірін құрметтеуге шақырады. Әрбір көріністің астарында шынай өмірде ұл-қыздар айта алмай жүрген және әрбір кезеңде олардың өзін-өзі көрсетуге ұмтылысы, қайнап жатқан тіршіліктің бір мүшесі болып қалыптасуға әрекеті, қоршаған ортаның құпиясын білуге талпынысы байқалады. Сценарий авторлары да, кейіпкерлері де — орталықтың пациенттері. Балалар өздері ойлап тапты,” - дейді Дарияш Қасымова.
Сондай-ақ, орталықтың балалар бөлімінің дәлізінде суретшілер көрмесі өтті. Емделушілер балалық шаққа саяхат жасап, жарқын сәтті, жақын адамды немесе өміріндегі ұмытылмас күн, оқиғаны қылқаламмен ақ қағазға бейнеледі. Көрмеге қойылған шығармалардың басым бөлігі — жануарлар мен ойыншықтардың суреті. Екі автор-бала ғана ата-анасын еске түсірген. Ал бір емделуші ақ шашты әжесін сағынған секілді. Саябақта біреуді күтіп отырған қарияның бейнесі көрмеге келген қонақтардың қызығушылығын оятты. Әр туындының астарында балалардың балалық шаққа сағынышы менмұндалап жатқандай.
Әрі қарай мерекелік іс-шара асханада жалғасты. Емделушілер шеберлік дәріске қатысып, тұзды суға қамыр илеп, оған бояу қосып, мысықтың мүсінін жасады. Шығармашылыққа баулу арқылы олардың ойлау қабілетін дамыту, күйзелістен арылуға көмектесу дейді мамандар.
Алматы қаласында 3 мыңға жуық бала, жасөспірім психикалық динамикалық бақылауда тұр.
Иә, Алматы қалалық Психикалық орталықтың ғимараты ерекше балалардың шығармашылық алаңына айналды. Орталықтың дәрігерлері, медицина қызметкерлері қоғамнан оқшау өмір сүретін кішкентай науқастарды мереке қарсаңында осылай қуантты
Елімізде басталған «Дәрігер – балалардың жанашыры» акциясы аясында олар бақша өнімдерін егу, баптаудың қыр-сырын үйрететін шеберлік дәрісіне қатысты.
Психикалық ауруға шалдыққан балалар үшін арт-терапия, еңбек терапиясының пайдасы зор. Қылқаламның құдіреті емделушіге эмоциясын білдіруге, ішіндегі қорқыныш пен уайымын бүкпей ақтарып, мазалаған кеселмен күресуге мүмкіндік береді. Әрі науқастың шығармашылық дағдыларын дамыту арқылы өзін-өзі бағалауды жетілдіруге пайдасы зор дейді Балалар бөлімінің меңгерушісі Ольга Александрова.