«Әділетті және прогрессивті Қазақстанның халықтық Конституциясы үшін!» жалпыұлттық коалициясы штабының мүшелері «Алатау» дәстүрлі өнер театры ұжымымен кездесті.
Онда спикерлер конституциялық реформаның бағыт-бағдары және алдағы 15 наурызда өтетін Референдумның мән-маңызына тоқталды.
«Жаңа Конституция – бұл жай ғана заңдар жиынтығы емес, ол – мемлекетіміздің берік іргетасы, қоғам өмірінің негізгі бағытын айқындайтын басты құжат болмақ. Сондықтан ондағы әр бап, әр тармақ ел тағдырымен тығыз байланысты өрілген. Жаңа Конституцияда, әсіресе адами капиталға аса мән берілген. Яғни, бұл – сіз бен біздің жарқын өмірімізге кепіл болады деген сөз», – деді штаб мүшесі, ҚР еңбек сіңірген қайраткері Қарагөз Сүлейменова.
Спикерлер сондай-ақ Референдум – әр азаматтың ел дамуына өз көзқарасын білдіру құқығы екенін айта келе, өнер ұжымын белсенді азаматтық ұстаным танытуға шақырды.
«Әр дауыс – ел болашағына қосылған үлес. Бүгін қабылданған шешім ертеңгі жарқын өміріміздің бағдаршамы десек қателеспейміз. Сондықтан Референдумнан қалыс қалмайық. Еліміздің дамуы мен тұрақтылығы – бәрімізге ортақ құндылық», – деді штаб мүшесі, «Желтоқсан ақиқаты» республикалық қоғамдық бірлестігінің төрағасы Болат Құрымбаев.
Ал өз кезегінде «Алатау» театры ұжымы атынан сөз сөйлеген өнер өкілдері конституциялық реформаны қолдайтындарын білдірді.