Өңірлік коммуникациялар қызметінде өткен баспасөз мәслихатында Наурызбай ауданының әкімі Назира Тоғызбаева осылай деп хабарлады.
Аудан қолайлы қалалық орта қалыптастыруға барын салып жатыр. 2025 жылы «Халық қатысатын бюджет» бағдарламасы аясында тұрғындар ұсынған 1 370 бастаманың ішінен 34 жоба іріктеліп алынып, оны жүзеге асыруға 2,5 млрд теңге бөлінген, - деп хабарлайды Aqshamnews.kz.
Қазір абаттандыруға арналған 16 жоба, қоғамдық кеңістік құратын 9 жоба мен аула аумақтарын жаңартуды көздейтін 6 жоба аяқталып қалған.
Аяқталған бастаманың бірі – «Шұғыла» тұрғын үй кешеніндегі жаяу жүргіншілер аймағын абаттандыру. Мұнда балалардың ойын алаңы, демалыс аймақтары жасалып, жарықтандырып, автосуару жүйесі орнатылып, көгалдандыру жұмыстары жасалды.
Сонымен қатар 47 аула жөнделіп, Райымбек, Досмұхамедов, Карьерная көшесі мен Қарғалы өзені бойында абаттандыру жұмысы жүргізіліп жатыр.
Тастыбұлақ өзенінің бойында ұзындығы 1,4 шақырым болатын жаяу жүргіншілер жағалауы салынып жатыр, оны 2026 жылдың қараша айында аяқтамақ. Сонымен қатар Тастыбұлақ пен Қарғалы өзенінің жағалауын бекіту жұмысы қатар қолға алынды. Келер жылы абаттандыру жұмыстары Абай даңғылы мен Қонаев, Алатау, Әшімов, Шаляпин көшесінде жалғасады. Бұл аумақтарға 552 сәндік шам мен жаңа көгалдандыру жүйесі орнатылады.
«Біз ауданның әр кварталы жайлы болып, жасыл-желекке оранып тұрғанын қалаймыз. Сондықтан абаттандыруды жүйелі түрде жүргізіп жатырмыз», - деді Назира Тоғызбаева.