Наурызбай ауданында соңғы он айда әлеуметтік қолдау мен жұмыспен қамту жағы еселеніп өсті.
11 мыңнан астам адам (2 800 отбасы) адрестік әлеуметтік көмек алып, 12 мыңнан астам адамға біржолғы төлемдер төленген, - деп хабарлайды Aqshamnews.kz.
Сонымен қатар, аз қамтылған отбасыларды қолдау, балалар мен инклюзивті бағдарламаларды дамыту, тұрғындарды жұмыспен қамту бойынша да көп жұмыс істеліп жатыр. Өңірлік коммуникациялар қызметінде аудан әкімі Назира Тоғызбаева журналистерге осылай деп хабарлады.
Жергілікті бюджеттен ерекше қажеттілігі бар азаматтарды қолдауға 60 млн теңге бөлініп, мүгедектігі барларға инновациялық арбалар мен жүріп-тұруға арналған құрылғылар алынды. Қазір жоспарланған 16 құралдың 13-і сатып алынған. Сонымен қатар, кохлеарлық импланттарға арналған қызметтерге 51 млн теңге жұмсалып, 8 адамға көмек көрсетілді. Жыл соңына дейін тағы 6 арба мен 6 кохлеарлық имплант сатып алу жоспарланып отыр.
«Кәсіпкерлікті дамыту» ұлттық жобасы аясында 3 700 тұрғын жұмыспен қамтылып, олардың ішінде әлеуметтік, жастар тәжірибесі, қоғамдық жұмыстар мен тұрақты жұмыс орындарына орналастырқандар да бар.
Әлеуметтік орталықтарда көпбалалы және аз қамтылған әйелдер тігін, косметология, компьютерлік сауаттылық сияқты мамандықтарды үйреніп, балалар шығармашылық пен тіл үйірмесіне қатысады. Қарт азаматтар «Белсенді ұзақ өмір орталығында» спортпен, бимен және шығармашылықпен айналысады. «TenQogam» орталығы мүмкіндігі шектеулі жандарға компьютерлік дағдыр, ағылшын тілі мен кәсіпкерлік негізін үйретеді.
«DamuBala» бағдарламасы аясында 4 мыңнан астам бала тегін үйірмелер мен спорт секцияларына қатысады, бағдарламаны бақылау мен қолдау мақсатында аудан әкімдігі есептік іс-шаралар өткізеді.
Аудан осылайша тұрғындарды әлеуметтік қорғау мен дамуға мүмкіндік жасап, білім мен жұмыспен қамту саласында кешенді қолдау көрсетіп отыр.