Көктөбе шағынауданында кәріз желілерінің құрылысы аяқталып, нәтижесінде 4 750 тұрғын үй қаланың орталықтандырылған су бұру жүйесіне қосылу мүмкіндігіне ие болды, – деп хабарлайды aqshamnews.kz.
Бұл туралы Медеу ауданы әкімдігінің мамандары айтты.
Жоба аясында жалпы ұзындығы 20 шақырым болатын инженерлік желі салынды. 17 көше толықтай кәріз жүйесімен қамтылды. Абоненттік қосылу нүктелері жер аумақтарының шекарасына дейін жеткізілді, бұл тұрғындардың жүйеге жедел қосылуына мүмкіндік береді.
Құрылыс жұмыстары аяқталғаннан кейін барлық аумақтарда жол жабыны толық қалпына келтірілді.
Аудан әкімдігінің мәліметінше, жобаны іске асыру санитарлық қауіпсіздік деңгейін арттыруға, қоршаған ортаға түсетін жүктемені азайтуға және тұрғын үй құрылысының одан әрі дамуына жағдай жасауға мүмкіндік берді.