Оларды алғашқы оқу күнімен құттықтап, естелік сыйлықтар табыс етті, деп хабарлайды aqshamnews.kz тілшісі.
Білім күні Алматы қаласы полиция департаментінің бастығы Айдын Кабдулдинов Шоқан Уәлиханов атындағы №12 мамандандырылған гимназияға барып, мектеп оқушыларын жаңа оқу жылының басталуымен құттықтады.
Салтанатты жиында қала полициясының басшысы оқушыларға ақ тілегін айтып, білім алуда табыс, жаңа жетістіктер мен жарқын бастамалар тіледі.
– Бүгін – әрбір оқушы үшін ерекше күн. Әсіресе мектеп табалдырығын алғаш аттаған бүлдіршіндер үшін бұл күннің орны бөлек. Дәл осы жерде үлкен армандар басталып, алғашқы достар табылып, баланың мінезі қалыптасады. Сіздерге білімді қызығушылықпен меңгеріп, алдарыңызға биік мақсаттар қойып, қарапайым қауіпсіздік ережелерін әрдайым есте сақтауды тілеймін. Ал біз, ересектер, мектептегі жылдарыңыздың қызықты әрі қауіпсіз өтуі үшін бар күшімізді саламыз, – деді Айдын Кабдулдинов.
Полиция департаментінің бастығы мерекенің ең кішкентай қатысушылары – бірінші сынып оқушыларына ерекше көңіл бөлді. Салтанатты жиыннан кейін ол бүлдіршіндердің сыныбына барып, оларды алғашқы оқу күнімен құттықтап, естелік сыйлықтар табыс етті.
Сондай-ақ полиция қызметкерлері бірінші сынып оқушыларына қауіпсіздік тақырыбында қысқаша түсіндіру жұмыстарын жүргізді. Балаларға жолдағы жүріп-тұру ережелері, көшеде сақ болудың маңызы және қауіп төнген жағдайда кімнен және қайда көмек сұрау керектігі түсіндірілді.