Күн сайын аудан тазалығын қамтамасыз етуге 620-дан астам жұмысшы мен 107 арнаулы техника жұмылдырылады, деп хабарлайды aqshamnews.kz тілшісі.
Алмалы ауданында абаттандыру мен қалалық ортаны күтіп ұстауға байланысты істелген жұмыстың аралық қорытындысы шықты. Биыл «Халық қатысатын бюджет» бағдарламасы аясында тұрғындар дауыс берген 19 жоба жүзеге асып жатыр. Оның ішінде 11 аула аумағы мен 8 қоғамдық кеңістік бар. Бұған қоса, жөндеу бағдарламасы бойынша 38 аула жаңартылды. Өңірлік коммуникациялар қызметінде аудан әкімі осы туралы баяндады.
Арман Шамшин өз сөзінде тазалық қала тұрғындары үшін қолайлы ортаның негізгі элементінің бірі екеніне тоқталды. Осыған байланысты коммуналдық қызметтердің жұмыс кестесі өзгерді: аула мен тротуарды тазалау енді таңғы сағат 7:00-де басталады, бұл көшелерді жұмыс уақыты басталғанша тазалап үлгеруге мүмкіндік береді. Күн сайын аудан тазалығын қамтамасыз етуге 620-дан астам жұмысшы мен 107 арнаулы техника жұмылдырылады.
«Таза Қазақстан» экологиялық бағдарламасымен жыл басынан бері ауданда 32 акция өтіп, 1650 текше метр қоқыс шығарылды. Тұрғындар да тазалық жұмысына атсалысып, әркім өз ауласында сенбілік ұйымдастырып жатыр.