Алматыда полиция тұрмысы нашар отбасыларды тұрғылықты жері бойынша тексеру жұмыстарын жүргізуде, - деп хабарлайды aqshamnews.kz Polisia.kz-ке сілтеме жасап.
Қазақстан Республикасы Ішкі істер министрі жариялаған "Профилактика жылы" аясында "Полиция Заң мен тәртіп күзетінде" ұранымен Алматыда 16-23 маусым аралығында "Отбасы" қалалық жедел-профилактикалық іс-шарасы өтуде. Іс-шараның басты мақсаты – отбасы-тұрмыстық қатынастар саласында жасалатын қылмыстар мен құқық бұзушылықтардың алдын алу, сонымен қатар халықтың құқықтық сауаттылығын арттыру. Полицейлер бұрын тұрмыстық зорлық-зомбылық жасағаны үшін айыпталған азаматтарды, сондай-ақ тұрмысы нашар отбасыларды тұрғылықты жері бойынша тексеру жұмыстарын жүргізуде. Агрессивті отбасы мүшелеріне қатысты шығарылған қорғаныс нұсқаулығы мен арнайы талаптардың сақталуын бақылауға ерекше назар аударылуда.
- Тұрмыстық зорлық-зомбылық - жеке мәселе емес, қоғамдық қауіпсіздікке қатер төндіретін мәселе. "Отбасы" ЖАІ аясында біз күн сайын бұрын жанжалдар тіркелген мекенжайларға шығып, отбасылармен сөйлесіп, заңнаманы түсіндіріп отырамыз. Біз үшін түйткілді мәселені анықтау ғана емес, қайғылы оқиғалардың алдын алу маңызды. Алдын алу – басты міндет, - деді, Түрксіб аудандық полиция басқармасының бастығы Думан Аухадиев.
Баяндамашының айтуынша, шара барысында бір ғана Түрксіб ауданы бойынша 415 қорғау нұсқамасы шығарылып, әлеуетті құқық бұзушылардың іс-әрекетін шектеу бойынша 81 іске қатысты арнайы талаптар қолданылған.