Балаларды қорғау күніне арналған ауқымды қалалық акция аясында №6 мектеп-гимназиясында жаппай таңғы жаттығу өтті, - деп хабарлайды aqshamnews.kz тілшісі.
Ұл-қыздар сапқа тұрып, түрлі жаттығуларды белсенді орындады. Көңілді музыка балалардың қимылына серпін беріп, кіші сынып оқушылары өздерінен үлкендерге дес бермей, бар ынтасымен қатысқан. Балалардың көңілін көтерген жайт — жазғы демалыстың басталуы мен оқу жылының аяқталуы.
Оқушыларды жазғы демалыстың басталуымен және келе жатқан мерекемен мектеп мұғалімдері мен арнайы келген қонақтар құттықтады. Олардың ішінде – футзалдан Қазақстан құрамасы мен алматылық "Қайрат" командасының бұрынғы ойыншысы Серік Жаманқұлов та болды.
Спортшы балаларға тек оқуда табыс емес, сонымен қатар мықты әрі епті болып өсіп, елге лайықты азамат болуды тіледі.
"Бүгінгі таңғы жаттығу Балаларды қорғау күніне арналған республикалық акция аясында өтіп жатыр. Бұл – салауатты өмір салтын насихаттаудың бір жолы. Кіші және жоғары сынып оқушылары шараға үлкен қызығушылықпен қатысты", – деді мектеп-гимназия директоры Айдар Буитов.
Жаттығу аяқталған соң оқушылар үйге асықпай, танымал спортшыдан қолтаңба алып, естелік суретке түсті.
"Спорт — тек денсаулықтың кепілі емес, сонымен қатар тәртіпке баулитын құрал. Ең бастысы – балалардың бос уақытын пайдалы өткізуіне көмектесіп, көше әсерінен аулақ ұстайтын мүмкіндік", – деді он дүркін Қазақстан чемпионы.