Алматыда бастапқы медициналық-санитарлық көмек көрсететін емханалар арасында байқау жарияланды. «БМСК көшбасшысы» байқауын Медициналық сақтандыру қорының оңтүстік астаналық филиалы ұйымдастырып отыр.
Хабарламаға сүйенсек, бүгін басталған байқау желтоқсанның 15-інде өз мәресіне жетеді. Оған Қормен жұмыс істейтін 76 алматылық емхана түгелге дерлік қатысуы тиіс.
«БМСК көшбасшысы» - Қордың жаңа бастамаларының бірі. Ол пациент қамын жейтін, халық денсаулығын сақтауға барын салатын үздік емханаларды анықтап, медициналық көмек сапасын жақсарта түсуге ықпал етеді деп сенемін. Себебі қай-қайсымыз да бас ауырып, балтыр сыздай қалса емханаға қараламыз», - деді Алматы филиалының директоры Ілияс Мұхамеджан.
Үздік емхана МӘМС жүйесінде сақтандырылған азаматтардың үлес салмағы, арыз-шағым саны, ақпараттандыру жұмыстарының жүргізілу деңгейі мен диспансерлік есепте тұрған науқастардың шұғыл түрде ауруханаға түсу фактілері сынды талаптар негізінде анықталмақ.
Байқау жеңімпаздары бағалы сыйлықтармен марапатталады.