Алматының Мультимедиялық дәстүрлі музыка орталығында «Тәңір сыйы – Тәуелсіздік» тақырыбында кездесу өтті.
«Дөңгелек үстел» басындағы әңгімеге желтоқсаншы қаракөздер – Несіпкүл Еңсебаева, Ақкүміс Ықыласова және Бағила Ағманова шақырылған болатын. Олар жастар алдында 1986 жылғы Желтоқсан оқиғасының мән-мағынасы туралы, сол кезеңдегі қазақ жастарының патриоттық сезімі, ұлттық намысы, ерік-жігері қандай болғандығы хақында әңгіме өрбітті. Омыдан 39 жыл бұрынғы Желтоқсан қозғалысының тарихи сабағы мен ел болашағына әсері жөнінде тарқатты. Жастар өз кезегінде меймандарға сауалдарын қойып, өзара пікір алмасты.
Бұл кездесудің бүгінгі ұрпақтың елге, жерге деген сүйіспеншілігін оятуға ықпал еткені сөзсіз.
«Мен де желтоқсанның ызғарлы күні алаңға барған қыздардың бірімін. «Қазақтарды жаппай ұрып-соғып жатыр екен» деген хабарды естігенде жүрегім кеудеме сыймай атқақтап кетті. Мен де олардың жанында болуым керек қой деп алаңға шығып кеттім. Замандастарымның сол күнгі толқуын, әрбір жастың жанарындағы от-жалынды, әсіресе қазақ қыздарының қайсарлығын сөзбен суреттеп жеткізу мүмкін емес. Суыққа да, күштік құрылымның таяғына да қарамай, елім, жерім, тілім деп рухтана түскен жастардың бейнесі әлі күнге көз алдымда. Алаңға шыққандардың талайы қудаланды, денсаулығынан да айырылғаны да аз емес. Тәуелсіздік бізге осылай жеткен. Егемен елдің ертеңі – өздеріңе аманат!», – деді желтоқсаншы Бағила Байбаққызы.