Алматы қаласының Орталық қалалық клиникалық ауруханасында күрделі эндоваскулярлық ота — сол жақ бұғанаасты артериясының сағасына стент қою (стенттеу) сәтті жүргізілді.
Отаны қан тамырлары хирургы Сұлтан Илиев жасады. Науқаста жиі бас ауруы, бас айналу, физикалық жүктемеден кейін есінен тану және құлақтағы шу сынды Стил синдромының белгілері байқалған.
Мұндай белгілер ми мен аяқ-қолдағы қан айналымының бұзылуына байланысты туындайды.
Тексеру нәтижесінде бұғанаасты артериясының сағасында атеросклероздық тарылу (стеноз) анықталды. Қалыпты қан айналымын қалпына келтіру үшін стенттеу жасалып, қан тамырының тарылған бөлігі кеңейтіліп, қан айналымы қалпына келтірілді.
Отадан кейін науқастың жағдайы едәуір жақсарды. Бас айналу мен есінен тану тоқтап, денсаулығы түзелді.
Мұндай жоғары технологиялы оталар Орталық қалалық клиникалық ауруханада заманауи ангиографиялық жабдықта жүргізіледі.
Бұл әдіс қан тамыр ауруларын ашық хирургиялық отасыз тиімді емдеуге, оңалу кезеңін қысқартуға және науқастардың өмір сүру сапасын арттыруға мүмкіндік береді.