Салмағы 4 кг сәби құйымшақ түбінде үлкен ісікпен дүниеге келді. Бұл патология қатерсіз болғанымен, өмірдің алғашқы айларында қатерлі ісікке айналу қаупі бар.
Сәби туғаннан кейін бірден перзентханадан Балалар шұғыл медициналық көмек көрсету орталығына, жаңа туған нәрестелердің жансақтау бөліміне ауыстырылды. Отаға толық дайындық жасалып, өмірінің екінші күнінде неонатальды хирургтар ісікті алып тастады.
«Бала ауруханаға үлкен қатерсіз ісік — сегізкөз-құйымшақ аймағының тератомасымен түсті. Ісік сүйек, жұмсақ тін және кистозды қуыстан құралған. Ота сәтті өтті, және әдетте пластикалық хирургияда қиындықтар туындайтын болса да, бұл жолы бәрі ойдағыдай болды. Біз пластикалық отаны сәбиге болашақта ешқандай ыңғайсыздық тудырмайтындай етіп жасадық. Бала аман-есен үйіне шығарылды», — дейді Балалар шұғыл медициналық көмек көрсету орталығының хирургі Жалғас Құниязов.
Ота 75 минутқа созылды. Хирург және реаниматолог мамандардың тынымсыз еңбегінің арқасында бала салмағы 1 кг болатын үлкен сүйек-кистозды ісіктен құтылды.
«Сегізкөз-құйымшақ тератомасы — неонаталды кезеңде жиі кездесетін ісік. Ол құрсақта қалыптасып, нәрестемен бірге өседі, кейде ұрықтың дамуы үшін маңызды дәрумендерді алып қояды. Біздің жағдайда ісік 14*20 см көлемге дейін өсті. Тератома толығымен алынды, баланың жағдайы қанағаттанарлық, үйіне шығарылды. Біздің орталық айына 100-ге жуық жаңа туған нәрестеге ота жасайды. Туа біткен ақаулардың себептеріне экология, климат, тұқым қуалаушылық және жұқпалы аурулар әсер етеді. Сонымен қатар, біз туа біткен ақаулардың басты себептерінің бірі әйелдің жүктілік кезінде жұқтырған вирустық инфекциясы екенін анықтадық», — деп түсіндірді бөлім меңгерушісі Саматбек Мырзахмет.
Алматыдағы Балалар шұғыл медициналық көмек көрсету орталығының іріңді-торакалды хирургия және неонаталдық хирургия бөлімшесі 30 төсек-орынға есептелген. Бұл орталыққа еліміздің барлық аймағынан ата-аналар балаларын емдетуге әкеледі.