Алматының Алатау ауданындағы №196 жалпы білім беретін мектепте орналасқан №636 сайлау учаскесінде сайлаушыларға ерекше көңіл-күй сыйлаған көрініс болды, – деп хабарлайды aqshamnews.kz тілшісі.
Польша елінен келген халықаралық байқаушылар Kline Kazimierz Mariusz, Ueberzhan Katerzyna, Gabowski Krzysztof қазақтың ұлттық «Бәйге» ойынына қатысып, өзара бақ сынады.
№636 Сайлау учаскесінің төрағасы Айжан Серікқалиқызының айтуынша, ұлттық ойындарды ұйымдастырудағы басты мақсат – дауыс беруге келген тұрғындардың кезекте ұзақ күтіп, жалығып кетпеуіне жағдай жасау.
– Бүгін Құрылтай сайлауына дауыс беруге келіп жатқан алматылықтар өте көп. Тұрғындар ұзақ кезекте жалықпас үшін ұлттық ойындардан жарыс ұйымдастырдық. Мақсатымыз – кезекте тұрған азаматтарға көтеріңкі көңіл-күй сыйлап, уақытын қызықты өткізуге мүмкіндік беру, – дейді сайлау учаскесінің төрағасы.
Түс мезгілінде №636 учаскесіне келген шетелдік байқаушылар да ұлттық ойынға қызығушылық танытып, «Бәйге» сайысына қатысып көрді. Сайыста бақ сынаған қонақтарға естелік ретінде шаңырақ, асық секілді қазақы кәдесыйлар табысталды.
№636 сайлау учаскесінде сайлау күні ерекше әрі жылы атмосфера орнаған. Ауладағы әуезді әуен, ұйымдастырылған қолөнер шеберлерінің көрмесі, мектепке қажетті заттардың жәрмеңкесі мен ұлттық ойындар тұрғындардың көңіл-күйін көтерді. Маңызды қоғамдық іс-шарамен қатар ұлттық дәстүр мен мәдениетті дәріптеген бұл бастама шетелдік қонақтардың да қызығушылығын оятты.
Қазақтың ұлттық ойындары арқылы сайлау учаскесінде қалыптасқан осындай әсерлі көрініс тұрғындарға да, халықаралық байқаушыларға да есте қаларлық сәт сыйлады.