Алматыдан Қазақстанның көші-қон заңнамасын бұзған 40 шетел азаматы елден шығарылды, – деп хабарлайды aqshamnews.kz тілшісі Полиция департаментінің баспасөз қызметіне сілтеме жасап.
Заң бұзғандардың барлығы полицияның бақылауымен рейстік автобус арқылы шекараға дейін жеткізілген.
«Біз қала аумағында шетел азаматтарының көші-қон заңнамасын сақтауын және елде заңды негізде болуын тұрақты бақылауда ұстаймыз. Анықталған тұлғалар көші-қон режимінің талаптарын бұзғандықтан, заңға сәйкес елден шығарылды. Біздің міндет - қоғамдық тәртіпті қамтамасыз ету, қала тұрғындарының қауіпсіздігін сақтау және Қазақстан Республикасы аумағында жүрген әр азаматтың заң талаптарын орындауына қол жеткізу», — деді Алматы қаласы ПД Көші-қон қызметі басқармасының бастығы Еркін Амантаев.
Полиция мәліметінше, шетел азаматтарын елден шығару шарасы қолданыстағы заңнама талаптарына қатаң сәйкес жүргізілген. Әрбір тұлғаға қатысты құжаттар рәсімделіп, шекараға дейін жеткізу толық бақылаумен жүзеге асырылған.