Алматыда Экологтар күні мен Дүниежүзілік қоршаған ортаны қорғау күніне орай ұйымдастырылған іс-шаралар аясында жалпықалалық экологиялық сенбілік өтті. Бұл туралы қалалық Экология және қоршаған орта басқармасының өкілдері айтты, – деп хабарлайды aqshamnews.kz тілшісі.
Экологиялық акция қаланың санитарлық жағдайын жақсарту, қоғамдық кеңістіктерді көріктендіру және тұрғындардың экологиялық мәдениетін арттыру мақсатында ұйымдастырылды.
Сенбілік Алматының барлық сегіз ауданындағы 12 аумақта өтті. Тазалық жұмыстарына қала тұрғындары, мемлекеттік органдардың, коммуналдық қызметтердің, қоғамдық ұйымдардың өкілдері, еріктілер мен экологиялық белсенділерді қоса алғанда 7 100-ден астам адам қатысты. Іс-шараларды өткізу үшін 153 бірлік арнайы техника жұмылдырылды.
Акция қорытындысы бойынша 1 139 текше метр қоқыс пен қалдық жиналып, шығарылды.
Тазалық жұмыстары Үлкен Алматы, Қарғалы, Кіші Алматы, Жарбұлақ, Ақсай және Қарасу өзендерінің аумақтарында, сондай-ақ «Оңтүстік» саябағында, «Аюсай» визит орталығында, алғашқы қалалық экохабта, Green Recycle және Technic Destroy кәсіпорындарының аумақтарында және басқа да қоғамдық кеңістіктер мен экологиялық нысандарда жүргізілді.
Алматы қаласының Экология және қоршаған орта басқармасы өкілдерінің мәліметінше, мұндай іс-шаралар қоршаған ортаға жауапкершілікпен қарау мәдениетін қалыптастыруға, экологиялық сананы дамытуға және тұрғындарды қаланың тазалығын сақтауға белсенді тартуға ықпал етеді.