Алматыда «Батыс қақпасы» және «Шығыс қақпасы» полиорталықтарында ауқымды инфрақұрылымдық жобалар жүзеге асырылып жатыр, – деп хабарлайды aqshamnews.kz тілшісі.
Бұл келешегі зор қалалық аумақтарды жаңа жолдармен, инженерлік желілермен және коммуналдық инфрақұрылыммен қамтамасыз етіп, олардың одан әрі дамуына берік негіз қалайды. Бұл туралы Өңірлік коммуникациялар қызметінің алаңында өткен брифингте Алматы қаласы Құрылыс басқармасының басшысы Нұрбол Нұрсағатов мәлімдеді.
Атап айтқанда, Алатау ауданында Бауыржан Момышұлы көшесі, Мөңке би көшесі, Фариза Оңғарсынова көшесі және Рысқұлов даңғылының аралығындағы 298 гектар аумақта жалпы ұзындығы 25,5 шақырым болатын жаңа жол салынып жатыр.
Сонымен қатар инженерлік инфрақұрылымды жаңғырту жұмыстары қатар жүргізілуде. Жоба аясында «Алғабас» және «Ақбұлақ» қосалқы станциялары қайта жаңғыртылып, «Алғабас» пен «Ақкент» қазандықтары жаңартылады. Сондай-ақ «Трудовик» кәріз-сорғы станциясы қайта жаңғыртылып, жылу, сумен жабдықтау және электрмен қамту магистральдық желілері салынып жатыр.
Жұмыс кезең-кезеңімен жүзеге асырылуда. Тамыз айының соңына дейін жылу желілерінің құрылысы, қазан айының басына дейін магистральдық су құбыры мен кәріз желілері, ал қазан айының ортасына дейін магистральдық электрмен жабдықтау нысандарының құрылысы аяқталады деп жоспарланған.
Қаланың шығыс бөлігінде де ауқымды инфрақұрылымдық жұмыс жалғасуда. Шілде айының соңындағы жағдай бойынша су құбыры желілерінің құрылысы 40 пайыздан астам орындалды. Кәріз және электрмен жабдықтау желілері шамамен үштен біріне аяқталса, газбен жабдықтау нысандарының дайындығы 70 пайыздан асты. Сонымен қатар байланыс желілерін тарту және автомобиль жолдарын салу жұмыстары жалғасып жатыр.