Алматы әкімі Дархан Сатыбалды жұмыс сапары барысында әл-Фараби даңғылы бойындағы Есентай өзенінде велосипедшілер мен жаяу жүргіншілерге арналған көпір құрылысының барысымен танысты.
Қазір көпірдің әл-Фараби даңғылының оңтүстік жағындағы бөлігі толық аяқталған. Солтүстік бөлігіндегі құрылыс жұмыстары алдағы бір апта ішінде тәмамдалады деп жоспарланып отыр. Бұдан кейін инженерлік желілерді қайта орналастыру және оған іргелес аумақты абаттандыру жұмыстары жүргізіледі.
Сонымен қатар, қала әкімі әл-Фараби даңғылынан Рысқұлов даңғылына дейінгі аралықтағы Есентай өзені жағалауын жаңғырту жобасының жүзеге асу барысын тексерді. Демеушілердің қолдауымен іске асырылып жатқан жоба аясында гидротехникалық нысандар қалпына келтіріліп, өзен арнасы тазартылып жатыр. Сондай-ақ, темірбетон құрылымдары жөнделіп, жаңа қоршаулар орнатылуда, жаяу жүргіншілер көпірлері салынып, тротуарлар жаңартылып, аумақ көгалдандырылып жатыр.
Бүгінде жобаның шамамен 50 пайызы орындалған. Қала әкімі құрылыс қарқынын күшейтіп, сапаны сақтай отырып, негізгі жұмыстарды биылғы құрылыс маусымында аяқтауды тапсырды.