Алматы қаласының Қылмыстық-атқару жүйесі департаментіне қарасты №11 мекемеде рухани-ағартушылық бағытта семинар өтті, – деп хабарлайды aqshamnews.kz тілшісі.
Онда аталған балалар колониясында жазасын өтеп жатқан жасөспірімдерге қаладағы “Мырзахмет” мешітінің бас имамы Азамат Төлепов “Діни радикализм - қоғам қаупі” деген тақырыпта дәріс оқыды. Имандылық пен адамгершілік құндылықтары туралы насихат айтты. Сонымен қатар түзеу мекемесінің кітапханасына Мәдениет және ақпарат министрлігінің Дін істері комитеті дінтану сараптамасының оң қорытындысы берілген кітаптар сыйға тарту етті. Олардың арасында “Бабалар ізімен”, “Құран інжулері”, “Жұма уағызы”, “Дін - ізгілік бастауы” секілді тағы басқа да кітаптар бар.
Мемлекетіміздің тілі, салт-дәстүрі, әдет-ғұрпы, өнері мен өнегесін танып, мұра ретінде сақтап, мәдениетін насихаттауды мақсат ету керектігі де айтылды.
“Жан дүниесі рухани бай, діни сауатты, ой-өрісі кең болып өскен, өнерлі, ұлттық тәрбие алған жас буын кез келген теріс діни ағымының жетегінде кетпей, өз қауіпсіздігін өзі сақтай алатыны сөзсіз. Кездесудің басты мақсаты - аяғын жаза басып қылмысқа бой алдырған жастардың бойында өмірге деген оң көзқарас қалыптастыру, оларды жат ағымдардан сақтандыру”, - дейді Жедел бөлімнің ТОЖ аға жедел уәкілі, әділет аға лейтенанты Күмісбек Тілеуханұлы.
Іс-шара соңында сотты болған жасөспірмдер бас имамға көкейіндегі жүрген сұрақтарын қойып, еркін диалог құрды.