Алматыда қазір 17 конфессияға жататын 190 діни бірлестік жұмыс істейді, – деп хабарлайды aqshamnews.kz тілшісі.
Өңірлік коммуникациялар қызметінде өткен брифингте Алматы қаласы Дін істері басқармасының басшысы Нұрлан Қиқымов осылай деп мәлімдеді.
Дін істері басқармасы конфессияаралық диалогты жүйелі түрде дамытып, діни іс-шаралардың қауіпсіздігін үйлестіріп, қоғамдық келісімді нығайтуға бағытталған бірлескен әлеуметтік бастамаларды жүзеге асырып отырады.
Спикердің айтуынша, Алматыда 120 діни нысан бар екен, оның 56-сы мешіт, 23 православ шіркеуі мен 8 католик шіркеуі, 89 протестант қауымдастығы және бар. 4 діни оқу орны, 7 намазхана мен діни әдебиет тарататын 31 стационарлық пункт те қызмет етеді. 136 миссионер тағы тіркеліпті.
«Біздегі дін ұстанатындардың басым бөлігі мұсылмандар мен православтар. Мешіттерге тұрақты түрде 80 мыңнан астам адам барады, православ шіркеуіне шамамен 20 мың адам, протестанттық бірлестіктерге 30 мыңға жуық адам барып тұрады», – деп толықтырды өз сөзін Нұрлан Қиқымов.
Конфессияаралық келісімді нығайтатын диалог алаңы да дамып жатыр. Қалада діни бірлестік басшыларының клубы жұмыс істейді, ол конфессиялар мен мемлекеттік органдарды байланыстыратын маңызды тетікке айналған.
Былтыр клуб 20 іс-шара өткізді, оның ішінде Қазақстан халқының бірлігі күні мен Конституция күніне арналған кездесу, форумдар, экологиялық акциялар мен спорттық іс-шаралар бар. Биыл да осы жұмыс жалғасып, клуб кемінде 20 іс-шара өткізуді жоспарлап отыр, бірінші тоқсанда-ақ конфессияаралық диалогты нығайтуға бағытталған 4 кездесу өтті.
«Клуб қызметінің маңызды ерекшелігі – діни бірлестіктер бастамаларын өзара қолдау. Басқарма мен клуб мүшелері қаладағы түрлі конфессиялар ұйымдастыратын іс-шараларға белсене қатысады», – деп атап өтті спикер.
Діни бірлестіктер қала өміріне де араласып жатыр. Атап айтқанда, олар «Таза Қазақстан» экологиялық акциясына қатысып, сенбілік өткізіп, аумақты абаттандыру жұмысына да атсалысып жүр. Дін істері басқармасы мен «Social Development Center» қоғамдық қоры бірлесіп ұйымдастырған, 700-ден астам адамды қамтыған Бутаков шатқалындағы үлкен сенбілік соған мысал.
Тағы бір маңызды бағыт – діни іс-шаралардың қауіпсіздігін қамтамасыз ету. 2025–2026 жылдары басқарма Рождество, Пасха, Рамазан мен Ораза айт сияқты негізгі діни мерекелерді өткізу жұмысын үйлестірді. Барлық іс-шаралар заң шеңберінде, оқыс оқиғасыз штаттық режимде өтті.
Қорытындылай келе, спикер Алматыда діни ахуалдың тұрақты әрі бақылауда екенін, конфессиялар арасында ынтымақтастық бар екенін атап өтті.