Алматыда Халықаралық жастар күніне орай ұйымдастырылған ALMA LOVE 2026 жастар фестивалі аяқталды, – деп хабарлайды aqshamnews.kz тілшісі.
Он күн ішінде фестивальге 20 мыңнан астам алматылық жас қатысып, бағдарлама аясында 50-ден астам мәдени, білім беру, спорттық, экологиялық және қоғамдық іс-шара ұйымдастырылды. Бұл туралы қалалық Жастар саясаты басқармасы хабарлады.
Фестивальдің гранд-финалы 12 тамызда «Шабыт» жазғы амфитеатрында өтті. Фестивальдің негізгі тақырыптары «Адал азамат» құндылықтары, «Заң мен тәртіп» қағидаты және «Таза Қазақстан» жалпыұлттық бастамасы болды.
«Мемлекет басшысы Қасым-Жомарт Кемелұлы Тоқаев атап өткендей, өскелең ұрпақтың бойындағы патриотизм – болашаққа деген шынайы ұмтылыс. Президент жастарға, олардың күш-жігеріне, таланты мен біліміне үлкен сенім артады. Біз өз тарапымыздан осы сенімді нақты істермен ақтап, жастардың жан-жақты дамуына жағдай жасауымыз керек», – деді Алматы қаласы әкімінің орынбасары Абзал Нүкенов өз сөзінде.
Бүгінде Алматыда 770 мыңға жуық жас тұрады. 2026 жылы қала алғаш рет QS Best Student Cities рейтингі бойынша әлемдегі үздік студенттік қалалардың ТОП-80 қатарына енді. Жас ғалымдарға арналған өңірлік ғылыми гранттар енгізіліп, 30 жоба қолдауға ие болады. Сондай-ақ «Жастар қатысатын бюджет», Youth Nomads және қалалық комьюнити-орталықтардың жобалары жүзеге асырылуда.
«Заң мен тәртіп» қағидаты мен «Таза Қазақстан» бастамасына ерекше көңіл бөлінуде. Қалада мыңнан астам жастың басын қосқан «Әділет жастар одағы» жобасы жүзеге асырылуда. Алматыда отырғызылған әрбір үшінші көшет жастардың қатысуымен егілді.
Экологиялық бағыт ALMA LOVE бағдарламасында да кеңінен қамтылды. Фестивальде «Эко-Трак» – Алматыдағы алғашқы жылжымалы интерактивті экологиялық зертхана жұмыс істеді. Ол бөлек жиналған қалдықтарды қабылдауды экологиялық ағартушылық жұмыстармен ұштастырады. Финал барысында көрермендерді қоғамдық орындардың тазалығын сақтауға және қоқыс қалдырмауға шақырды.
Фестиваль бағдарламасына волонтерлік және әлеуметтік жобалар, ұлттық ойындар, зияткерлік алаңдар мен шығармашылық байқаулар да енді. Қазақ тіліне, білім мен мәдениетке арналған жеке блок ұйымдастырылды. Ал финалда спорт, мәдениет, волонтерлік, әлеуметтік және инклюзивті бастамаларды дамытуға үлес қосқан алматылық жастар марапатталды.
Музыкалық бағдарламаны «Сардар» тобы, AZHAR NAZAR, Ualimyrza, Ualikhan, KENZHE, Қазыбек Құрайыш және Нұржан Керменбаев жалғастырды. Кеш Алматы жастарының әнұранын орындаумен аяқталды.
ALMA LOVE фестивалі қалада екінші жыл қатарынан өткізіліп отыр. 2025 жылы оған 5 мыңнан астам адам қатысса, 2026 жылы фестиваль 20 мыңнан астам алматылық жастың басын қосты.
«Заманауи жастар саясаты – тек іс-шаралар мен жобалар ғана емес. Бұл – патриотизмді нақты іс-әрекетімен көрсететін, «Адал азамат» құндылығын адал еңбек пен жауапкершілік арқылы танытатын, «Заң мен тәртіп» қағидатын заңға және айналасындағыларға құрметпен ұстанатын, ал «Таза Қазақстан» идеясын өз қаласына күнделікті қамқорлық жасау арқылы жүзеге асыратын ұрпақты қалыптастыру», – деп қорытындылады Алматы қаласы Жастар саясаты басқармасының басшысы Азиз Қажденбек.