30 тамызда Қазақстанда учаскелік полиция инспекторлары қызметінің құрылған күні атап өтіледі, деп хабарлайды aqshamnews.kz тілшісі.
Мереке қарсаңында Алматы қаласы полиция департаментінде учаскелік полиция инспекторларына арналған салтанатты іс-шара өтті.
Алматы қаласы полиция департаментінің бастығы Айдын Кабдулдинов қызметкерлерді кәсіби мерекемен құттықтап, қоғамдық тәртіпті қамтамасыз ету мен құқық бұзушылықтардың алдын алудағы учаскелік инспекторлардың ерекше рөлін атап өтті. Ол қазіргі учаскелік инспектордың міндеті жасалған құқық бұзушылықтарға дер кезінде ден қоюмен ғана шектелмей, олардың алдын алуға, халықпен тұрақты байланыс орнатуға және азаматтардың полицияға деген сенімін нығайтуға бағытталуы тиіс екенін айтты.
Департамент бастығының айтуынша, бекітілген аумақта күнделікті жұмыс жүргізу туындаған мәселелерді дер кезінде анықтап, жанжалдардың ушығуына жол бермеуге мүмкіндік береді.
Іс-шара барысында қызметтік міндеттерін атқаруда жоғары нәтижелер көрсеткен, өз ісіне жауапкершілікпен қарап, кәсіби біліктілігін танытқан Алматының үздік учаскелік полиция инспекторлары атап өтілді. Қызметкерлерге ведомстволық наградалар мен естелік сыйлықтар табысталды.
Полиция қызметкерлерінің ата-аналарына да ерекше көңіл бөлінді. Заң талаптары мен азаматтардың қауіпсіздігін қорғаумен байланысты жауапты мамандықты таңдаған ұл-қыздарын тәрбиелегендері үшін ата-аналарға алғыс білдірілді.
Іс-шарада ішкі істер органдарының ардагерлері де ақжолтай тілектерін жеткізді. Аға буын өкілдері кәсіби тәжірибелерімен бөлісіп, қызметкерлерге сабырлылық, принципшілдік, жоғары кәсібилік және қызметтік борышқа адалдық тіледі.